काठमाडौं । नेपाल प्रहरीले यहि वैशाख १५ गते हुने उप– निर्वाचनको सुरक्षा तयारी पूरा भएको बताएको छ।
नेपाल प्रहरिले बिहीबार काठमाडौंमा पत्रकार सम्मेलन गरेर वैशाख १५ गते इलाम,२ (प्रतिनिधि सभा)र बझाङ १ (प्रदेश सभा) मा हुने उपनिर्वाचन क्षेत्रमा सुरक्षा व्यवस्था मिलाएको बताएको हो।
निर्वाचन पूर्व,निर्वाचनको दिन र निर्वाचनपश्चातको सुरक्षालाई छुट्टाछुट्टै कार्ययोजना बनाएर सुरक्षा व्यवस्था मिलाएको छ।दुवै जिल्लामा २ हजार ३ सय ८७ प्रहरी कर्मचारी खटाइने तयारी भएको नेपाल प्रवक्ता भीमप्रसाद ढकालले जानकारी दिनुभयो।निर्वाचनमा प्रदेश प्रहरी प्रमुखहरुले प्रत्यक्ष अनुगमन र समन्वय गर्नेगरि सुरक्षा व्यवस्था मिलाएको उहाँको भनाइ छ।
इलाम–२ बाट निर्वाचित पूर्वसभामुख सुवासचन्द्र नेम्वाङको भदौ २६ गते हृदयाघातको कारण निधन भएपछि सो निर्वाचन क्षेत्र रिक्त भएको थियो। यस्तै प्रदेश सभा सदस्य रहनुभएका बझाङ १ बाट निर्वाचित पृथ्वीबहादुर सिंहको गत असार २५ मा सवारी दुर्घटनामा परेर निधन भएको थियो।
संविधानको धारा ८४ को उपधारा ७ मा प्रतिनिधि सभाको कार्यकाल ६ महिनाभन्दा बढी अवधि बाँकी छँदै कुनै सदस्यको स्थान रिक्त भएमा त्यस्तो स्थान जुन निर्वाचन प्रणालीबाट पूर्ति भएको थियो सोही प्रक्रियाद्वारा पूर्ति गरिने व्यवस्था छ।
साथै प्रदेश सभाको हकमा धारा १७६ को उपधारा ८ मा कार्यकाल ६ महिनाभन्दा बढी अवधि बाँकी छँदै कुनै स्थान रिक्त भएमा जुन निर्वाचन प्रणालीबाट पूर्ति भएको थियो सोही प्रक्रियाद्वारा पूर्ति गरिने व्यवस्था छ।
निर्वाचन हुने दुवै स्थानमा मौन अवधि शुरु भइसकेको छ।