९ असार काठमाडौं ।सूचना तथा सञ्चारमन्त्री डा.विक्रम तिमिल्सिनाले सेवाग्राहीलाई केन्द्रमा राखेर सेवा प्रवाह गर्न निर्देशन दिएका छन् ।
सोमबार नेपाल टेलिकम भरतपुरको कार्यालय निरीक्षणका क्रममा सेवाग्राहीलाई केन्द्रमा राखेर जिम्मेवारी पूरा गर्न मन्त्री डा. तिमिल्सिनाले निर्देशन दिएका हुन् ।
सरकारी कार्यालयहरूमा सेवा लिन जान नपरे हुन्थ्यो भन्नेसम्मको गुनासो आउने गरेको भन्दै उनले छिटोछरितो ढङ्गबाट सेवा प्रदान गरी सेवाग्राहीको विश्वास जित्नु पर्ने आवश्यकता औंल्याए ।
सञ्चारमन्त्री डा. तिमिल्सिनाले भने, “१० वर्ष अगाडि र अहिलेको अवस्था फरक छ ।हिजो मान्छे एउटा सेवा लिनका लागि पाँच दिनसम्म कुर्न सक्थ्यो भने आज एक दिन पनि कुर्दैन, फोन गरेपछि अहिले नै आइदिए हुन्थ्यो भन्ने अपेक्षा भएकाले तपाईंहरुले सोहीअनुसार काम गर्नुपर्छ ।”
“सेवाग्राहीले तिरेको पैसाले कार्यालय सञ्चालन भइरहेका छन्, तपाईंको सबैभन्दा ठूलो जवाफदेहिता सेवाग्राहीप्रति हुनुपर्छ । सोहीअनुसार सेवाग्राही खुसी हुने गरी कार्यसम्पादन गर्नुहोला ” उनले थपे ।
नेपाल टेलिकमको कार्यालय व्यवस्थित गर्ने,नेपाल टेलिकमको पुनःसरचना, कर्मचारीको वृत्तिविकास,आवश्यक उपकरण र अन्य समस्याका बारेमा पनि उनले चासो राखेका छन् ।