१४ असार,काठमडौं।जल तथा मौसम विज्ञान विभाग,मौसम पूर्वानुमान महाशाखाले शनिबार साँझदेखि पश्चिम नेपालका विभिन्न प्रदेश र अन्य प्रदेशका केही ठाउँमा भारीदेखि अति भारी वर्षा हुने उल्लेख गरेको छ।
महाशाखाद्धारा जारी मनसुन विशेष बुलेटिनमा शनिवार साँझदेखि १६ गते बिहानसम्म कर्णाली प्रदेशको पहाडी भू–भाग,सुदूरपश्चिम प्रदेश,लुम्बिनी प्रदेशका पहाडी र तराईका भू–भागका केही स्थानहरुमा भारीदेखि धेरै भारी वर्षाको सम्भावना रहेको जनाइएको छ।
यस्तै यी बाहेकका अन्य प्रदेशको पहाडी भू–भागका एक–दुई स्थानमासमेत भारीदेखि धेरै अति भारी वर्षाको सम्भावना रहेको महाशाखाको भनाई छ।
जसका कारण भू–क्षय,बाढी, पहिरो तथा गेग्रान बहावको जोखिम रहेकाले शहरी तथा तराई क्षेत्रहरूमा डुबानको जोखिम रहेको,ठूला तथा साना नदी नाला र खोलाहरूमा पानीको सतह बढ्न सक्ने,दैनिक जन–जीवन,कृषि, स्वास्थ्य,पर्यटन,नदी क्षेत्र आसपासका निर्माण कार्य,सडक तथा हवाई यातायातसमेत प्रभावित हुन सक्ने भन्दै महाशाखाले सर्तक रहन आग्रह गरेको छ ।