सीता पौडेल(अर्चना)
काठमाडौं।नेपाल पत्रकार महासङ्घको निर्वाचन तोकिएकै समयमा सम्पन्न गर्न पत्रकारसम्बद्ध विभिन्न छ सङ्गठनले माग गरेका छन्।
महासङ्घको जेठ २६ गते तोकिएको निर्वाचनको मिति नजिकिँदै जाँदा सदस्यता र नामावली टुङ्गो लगाएर सावर्जनिक गर्न ढिलाइ गरिएको भन्दै प्रेस चौतारी नेपाल,प्रेस सेन्टर नेपाल,समाजवादी प्रेस सङ्गठन नेपाल,प्रगतिशील पत्रकार सङ्घ नेपाल,जनपत्रकार सङ्गठन नेपाल र क्रान्तिकारी प्रेस सङ्गठनले शनिबार संयुक्त रुपमा विज्ञप्ति जारी गर्दै सो माग गरेका हुन्।
सङ्गठनहरुले छिटो सदस्यता टुङ्गो लगाई तोकिएको समयमा निर्वाचनको सुनिश्चितता गर्न पनि महासङ्घ नेतृत्वसँग आग्रह गरेका छन्।
“निर्वाचन प्रयोजनका लागि वैशाख मसान्तभित्र निर्वाचन समितिलाई मतदाता नामावली उपलब्ध गराउन महाधिवेशनले निर्देश गरेकामा हालसम्म पनि निर्वाचन समितिलाई आधिकारिक सूची उपलब्ध नगराइएको प्रति हाम्रो गम्भीर ध्यानाकर्षण भएको छ”,विज्ञप्तिमा उल्लेख छ।
महासङ्घका अद्यावधिक सदस्यहरूको नामावली तत्काल निर्वाचन समितिलाई बुझाई सार्वजनिक गर्न र नामावलीमा छुट भएका क्रियाशील पत्रकारहरूको नामावली समावेश गरी निर्वाचन समितिबाट प्रक्रिया बमोजिम अन्तिम नामावली प्रकाशन गर्ने वातावरण बनाउनु पर्ने माग ति संगठनहरुको छ ।
“नेपाल पत्रकार महासङ्घको २६औँ महाधिवेशनबाट निर्वाचित कार्यसमितिको तीनवर्षे कार्यकाल २०८० चैतमा सकिइसके पनि नयाँ नेतृत्व चयन गरी पदभार हस्तान्तरणको प्रक्रियामा अलमल देखिएको छ।यसलाई कुनै पनि बहानामा अवरूद्ध गर्ने कार्य नगर्न केन्द्रीय नेतृत्वलाई गम्भीर ध्यानाकर्षण गराउँदछौँ”,विज्ञप्तिमार्फत भनिएको छ।
साथै महासङ्घको गौरवपूर्ण इतिहास,साझा चरित्र र गौरवलाई रक्षा गर्दै पूर्ण प्रेस स्वतन्त्रता, श्रमजीवी पत्रकारको हकहित र पत्रकारिताका मुद्दाहरूलाई सम्बोधन गर्न सम्बिन्धित सबै एकजुट हुनु पर्ने आवश्यत्ता औंल्याइएको छ।
विज्ञप्तिमा प्रेस चौतारी नेपालका अध्यक्ष गणेश बस्नेत,प्रेस सेन्टर नेपालका अध्यक्ष विष्णु सापकोटा ‘जुगल’,समाजवादी प्रेस सङ्गठन नेपालका अध्यक्ष विश्वमणि सुवेदी,प्रगतिशील पत्रकार सङ्घ नेपालका अध्यक्ष श्यामलाल पोखरेल,जनपत्रकार सङ्गठन नेपालका अध्यक्ष शेरबहादुर विश्वकर्मा र क्रान्तिकारी प्रेस सङ्गठनका संयोजक कमल बुढाले हस्ताक्षर गरेका छन्।
यता नेपाल पत्रकार महासंघले भने कार्यालयमा लगाइएको ताल खोलेर संवादमा आउन अनुरोध गरेको छ।