Author: सगरमाथा प्रेस

मनाङ । मनाङको नाम्के खर्कबाट औषधीय जडीबुटी यार्सागुम्बा सङ्कलन कार्य सुरु गरिएको छ । यहाँ यार्सागुम्बा पाउने धेरै खर्कहरु भए तापनि नासों गाउँपालिका–८ ताचैस्थित नाम्केबाट सङ्कलन थालिएको नासों–८ का वडाध्यक्ष याद घलेले बताउनुभयो । अध्यक्ष घलेका अनुसार १० गतेदेखि नाम्के खर्कबाट करिब दुई सय जनाले यार्सागुम्बा सङ्कलनको अनुमति लिएका छन् । संरक्षण क्षेत्र व्यवस्थापन समितिका अध्यक्षसमेत रहनुभएका यादले मनाङमा यार्सागुम्बा सङ्कलन थालिने पहिलो गन्तव्य नाम्के खर्क हो । “अन्नपूर्ण संरक्षण क्षेत्र आयोजना (एक्याप) इलाका कार्यालयको संयोजकत्वमा संरक्षण क्षेत्र व्यवस्थापन समितिले यार्सागुम्बा सङ्कलनका लागि अनुमति दिएपछि मात्रै खर्क जान पाउने प्रावधान रहेको छ, सोही अनुरुप यार्सागुम्बा सङ्कलनका निम्ति नाम्के खर्कमा स्थानीयका साथै बाहिरी जिल्लाबाट आएका व्यक्तिलाई सङ्कलन अनुमति दिइएको छ ” उहाँले भन्नुभयो।...