सत्ता गठबन्धनलाई दिगो र परिणाममुखी बनाउने एमालेको प्रतिवद्धता
काठमाडौं। नेपाल कम्युनिष्ट पार्टी (एमाले) को महाधिवेशन प्रतिनिधि परिषद्को प्रथम बैठकले वर्तमान सत्ता समीकरणलाई दिगो,परिणाममुखी र सफल बनाउने सङ्कल्प गरेको छ।
दुइदिनसम्म ललितपुरको गोदावरीमा बसेको बैठकले १५ बुँदे समसामयिक प्रस्ताव पारित र फाल्गुन २१ गते गठन भएको नयाँ समीकरणप्रति सन्तुष्ट व्यक्त गर्दै समिकरणलाई सफल,परिणामुखी र दिगो बनाउने प्रतिवद्धता व्यक्त गरेको हो।
आइतबार विभिन्न प्रतिवेदनमाथि समूहगत छलफलपछि तयार गरिएको निष्कर्षमा मुलुकमा स्थिरता र राष्ट्रियताको संवर्द्धनका लागि सत्ता समीकरणलाई निरन्तरता दिने प्रतिबद्धता व्यक्त गर्दै यसका विरुद्ध हुने कुनै पनि चलखेल र षड्यन्त्र चिर्न आह्वान गरेको एमालेका उपमहासचिव विष्णु रिमालले जानकारी दिए ।
गठबन्धनमा संलग्न पाँच दलले जारी गरेको साझा न्यूनतम कार्यक्रमलाई अघि बढाउने विषयमा पार्टीले जोड दिएको उनको भनाई छ ।
...